- ఏపీ లో భారీ వర్షాలు
- స్కూల్స్ కు సెలవులు
- తీరం దాటనున్న వాయుగుండం
బంగాళాఖాతంలో వాయుగుండం ప్రభావంతో ఆంధ్రప్రదేశ్‌ వ్యాప్తంగా విస్తారంగా వర్షాలు కురుస్తున్నాయి. వాతావరణశాఖ హెచ్చరికల మేరకు రాబోయే రోజుల్లో కూడా భారీ నుంచి అతి భారీ వర్షాలు కురుస్తాయని తెలిపింది. ఈ నేపథ్యంలో పలు జిల్లాల్లో పాఠశాలలకు సెలవులు ప్రకటించారు. అనంతపురం, శ్రీ సత్యసాయి, ప్రకాశం, చిత్తూరు, తిరుపతి జిల్లాల్లో గురువారం పాఠశాలలకు సెలవు ఉంటుందని జిల్లా కలెక్టర్లు తెలిపారు.
ఏపీ విపత్తుల నిర్వహణ సంస్థ ప్రకారం, వాయుగుండం రేపు తెల్లవారుజామున తీరం దాటే అవకాశం ఉంది. ఆ తర్వాత వాయుగుండం క్రమంగా బలహీనపడుతుందని అంచనా వేస్తున్నారు. ప్రస్తుతం ఈ వాయుగుండం చెన్నైకి 190 కిలోమీటర్లు, పుదుచ్చేరికి 250 కిలోమీటర్లు, నెల్లూరుకు 270 కిలోమీటర్ల దూరంలో కేంద్రీకృతమై ఉంది. పశ్చిమ వాయువ్య దిశగా గంటకు 17 కిలోమీటర్ల వేగంతో వాయుగుండం కదులుతున్నట్లు అధికారులు వెల్లడించారు. అదే వేగంతో కదిలితే, రేపు తెల్లవారుజామున చెన్నైకి దగ్గరగా పుదుచ్చేరి, నెల్లూరు మధ్య తీరం దాటే అవకాశం ఉంది.
వాయుగుండం తీరం దాటిన తర్వాత కొన్నిచోట్ల మోస్తరు నుంచి భారీ వర్షాలు కురుస్తాయని అధికారులు అంచనా వేస్తున్నారు. దక్షిణ కోస్తా, రాయలసీమ ప్రాంతాల్లోని పలు ప్రాంతాల్లో ఈ ప్రభావం అధికంగా ఉంటుందని చెప్పారు. మిగతా ప్రాంతాల్లో తేలికపాటి వర్షాలు పడతాయని అధికారులు తెలిపారు. ప్రజలు అప్రమత్తంగా ఉండాలని, అవసరమైన జాగ్రత్తలు తీసుకోవాలని సూచించారు.
ఇక వాయుగుండం ప్రభావంతో రాష్ట్రవ్యాప్తంగా విద్యాసంస్థలకు సెలవులు ప్రకటించారు. వాతావరణశాఖ సూచనల మేరకు ప్రకాశం, చిత్తూరు, తిరుపతి, అనంతపురం, శ్రీ సత్యసాయి జిల్లాల్లో గురువారం పాఠశాలలకు సెలవు ఇచ్చారు.
ఇతర జిల్లాల్లో కూడా పరిస్థితిని అధికారులు పరిశీలిస్తూ ఉన్నారు. ఏపీ హోం మంత్రి వంగలపూడి అనిత విపత్తుల నిర్వహణ సంస్థ కార్యాలయం నుంచి పరిస్థితిని పర్యవేక్షిస్తున్నారు. వాయుగుండం తీరం దాటిన తర్వాత ఎలాంటి పరిస్థితులు ఎదురైనా ప్రభుత్వ యంత్రాంగం సిద్ధంగా ఉందని హోం మంత్రి తెలిపారు.